艺人专访丨何依婷佗蛇B迎新年 自嘲论尽冇记性 老公成神队友
无线艺人何依婷（Regina）佗蛇B，获封“最美孕妇”的她在接受访问时自言体重已达人生高峰，自嘲论尽又冇记性，幸好有老公这位神队友为她排忧解难，希望蛇年喜事接踵而来，但暂未有计划三年抱两。
Regina首先向各位读者拜年：“首先祝大家蛇年新年快乐，身体健康，心想事成！”她表示在怀孕中过节感觉特别，虽然体力下降兼容易疲倦，但仍跟往年一样办年货及布置家居。“今年嘅新年对我嚟讲真系有啲唔同，因为系我第一次怀孕过新年。结婚之后，屋企嘅农历新年主要由我负责，比如买嘢、办年货、布置屋企等等。上年第一年都算OK，慢慢学点样pick up，例如买年货要点拣、地毡要买几大等等，都系要时间适应。但今年就真系有啲吃力啦。前几日我同老公出去买年货，行咗半日我就顶唔顺啦，同佢讲：‘唔得啦，我坐低等你，你去买啦。’因为真系行唔到太耐，个人好攰，腰又痛，周身唔舒服，体力上真系差咗啲。”除此之外，她也会四出跟亲友拜年，好让他们看一下其大肚模样。
问到是否成家中女王指点老公服侍她？Regina坦言刚好相反：“我老公好紧张，成日叫我‘唔好踎低’、‘唔好攞重嘢’，但我觉得自己都算灵活，唔使咁担心。不过，其实我真系论尽咗好多，试过喺屋企唔小心跌亲，踎低嗰阵一唔小心就坐咗落地下。所以我都应承咗佢，会再小心啲。”她透露现时开始准备婴儿用品，但暂时未有时间上育婴班：“我完全冇凑小朋友经验。（老公呢？）佢系神队友，好帮得手，好多时候我同佢讲去准备BB嘅嘢，佢好开心咁话好，好上心。”
Regina十分期待BB来临，同时对身体变化啧啧称奇：“望住自己个肚一日一日大真系好神奇，依家体重已经超过我认知以来最重，重咗十几磅。”除了体重，她又自爆记性差了不少：“真系完全记唔到嘢，大肚婆要食好多补充剂，我经常唔记得食咗未。我同老公讲我唔识驳咀，以前我好叻驳咀，依家讲乜我都话‘哦’，系有啲蠢嘅。而家我嘅反应都慢咗，以前可能会驳嘴，但而家佢讲一句，我就‘哦，系啊系啊’。”
Regina希望将来女儿能成为开心善良的人：“我觉得自己唔系虎妈，希望BB将来可以做一个开开心心、善良嘅人，因为现代社会竞争真系好大，读书同生活压力都好重。我觉得人生系一场体验，无论你考几多个A都好，最紧要系自己开心。我唔系要求佢一定要做精英，最紧要系佢活得开心，享受人生。”
回顾龙年，Regina以充满惊喜形容：“第一年成为人妻，拍咗两套剧，发现自己怀孕，好多转变。我系几随遇而安嘅人，好多嘢都系缘分。”问到会否再生B？她坦言暂时没有计划，又自认喜欢工作，预计坐完月就会复出幕前。
