艺人专访丨自嘲似工人姐姐 何远东心淡离巢TVB
有一段时间没有出现荧光幕的何远东（阿东），终于再有新剧《异空感应》播出；刚过了四十岁生日的阿东，感触地说：「我开始觉得要对自己好啲。」
阿东演过不少「入屋」角色，《降魔的》司机龙猫、《心理追凶》饰演弑母肥仔一角更令他人气急升，成为该年「民选最佳男配角」，随着恩师前无线监制王心慰（Amy）荣休，本身不是「亲生仔」的阿东亦被投闲置散，无奈步入「雪柜」，在生日当日，他决定与无线结束十六年宾主关系，「大骚剧集综艺我乜都试过，最后连『雪柜』都试埋，其实对一个演员来讲，我觉得都算好完整嘅。」
入行十六年，何远东从没放弃过影响他一生的舞台剧，除了演员身份，还一直兼职教小朋友话剧，亦庆幸成为他收入的主要来源，「的确系好耐冇拍剧，冇拍剧嘅时候，我都要生活，好彩我仲有能力可以去教书，同埋我亦都好有耐性，出入得最多就系中小学，佢哋有时都会问我『咦，阿Sir，你唔使开工拍戏咁得闲咩？』我只好答，因为我真系钟意演戏啰。」
冇试过入监制房「敲门」
阿东和细细粒陈嘉佳，曾经是无线的镇台肥孖宝，细细粒一早已选择离巢发展，阿东另外两位好友黄智雯及唐诗咏亦先后宣布离开，阿东说：「以前比较重戏嘅角色，其实来来去去都系两、三位监制（用我），我谂因为都有难度，监制揾你，系！佢好想用你，觉得角色啱你，都会想同你度身订造，写多两句、写多条线，会同你倾，做演员其实会好开心，但系慢慢就冇喇，总之你收剧本啦，都唔紧要，起码我知仲有监制揾我，其实我估佢哋花咗好大能力，要用好多力先可以说服到公司，麻烦你用何远东啦，希望大家批准。」
问阿东有没有试过入监制房「敲门」？他说：「讲真，一间公司运作我好明白，捧紧呢几个，梗系要推晒佢哋出嚟先啦，做咩要益你？你有啲咩可以俾返我呀？咁耐以嚟，我都几有骨气，我真系冇敲过门，唯一一次就系同Amy姐讲，我话如果你最后一套剧，我就算帮你路过扫街，我都要拍。」新剧《异空感应》是前无线监制王心慰荣休之作，阿东一早表明无论多少戏分、甚么角色都愿意接拍，「以前冇佢扶持我，我都冇咁多演出机会，佢喺无线已经关照咗我十几年。」
今年九月廿四日是阿东四十岁生日，他与好友到台湾庆生，一早就收到公司电话，以为是祝贺生日快乐，「我仲好开心喺度holiday，朝早收到WhatsApp，话系时候要倾下，同我倾合约问题，其实我好surprise佢哋唔记得我生日，anyway啦，只系叫你留低，冇再讲其他嘢，跟住我都苦恼咗一阵，其实我系咪应该继续留低呢？因为我强项系演戏，我谂观众认识我，都系因为我嘅角色，因为编剧监制导演拍得我好好，但系依家好似冇得发挥我嘅优点，一个演员唔俾佢演戏，你摆佢喺度其实佢冇用㗎，佢唔会识得发光，自己又大一岁，不如试下啦，我真系即刻覆佢㗎，佢问考虑成点？我就同佢讲，我个考虑系我唔考虑喇，跟住就打电话嚟，倾咗一个好长嘅电话，我都好庆幸嗰一刻自己冇动摇，证明我都真系受够，系人都知『雪柜』好冻啦，咁你唔走入去，你冇试过又点知呢？我喺间公司入面，我其实咩都试过，以一个唔系『亲生仔』，我一直都系part time约，但part time约系唔可以接拍其他嘢㗎，颁奖礼试过、台庆骚试过、大骚剧集综艺乜都试过，最后连『雪柜』都试埋，所以对于一个演员嚟讲，我觉得都算好完整嘅。」
问阿东的生日愿望，他说：「我开始觉得要对自己好啲啦，对自己好啲，有好多方面嘅，一来对自己身体好啲啦，仲要对自己个心好啲，因为我都几耳仔软，只要人哋对我有好少少，我都会死心塌地帮你做十样嘢，我之前从来冇谂过我会离开呢间公司，一路以嚟，我都觉得我真系可以做过世㗎，我就系一个咁嘅人，只要你嗰个地方，系俾到温暖同安全感我，其实我真系可以喺度好耐，点解要走？都可能少咗啲温暖，少咁啲安全感，好似都系时候，赖死都冇用。」
六个字最hard feeling
效力无线十六年，如何形容这段宾主关系？阿东自嘲似一名工人姐姐，「我系一个工人姐姐对住Mom咁样，Mom叫我做咩，我都会『Yes,Mom』，就算佢几挑剔，我都会自己改进，或者我都好想入到呢间屋，但到头来，即系十六年过去，最终都觉得未入到呢个屋企，可能始终我哋系有雇佣合约关系，哈哈！即系我好努力，到头来反问你点解做得咁多？做得咁好？唔通我要做得唔好咩？你问我咁多年来有冇啲咩job真系唔想做？真系冇，就算到依家有人话你系一只飞行棋，讲真我当年真系觉得冇问题，可能太单纯啦，反而最憎玩game嗰啲忌廉，塞晒落眼耳口鼻头发，好难洗呀！」
令阿东最有hard feeling，不是安排他出演甚么丑角，而是六个字，「有六个字真系好乞人憎，亦都传返入我耳仔，就系『你太好、你太多』，咁我谂大家都明啦，你想我点呢？依家呢一句说话，彷彿变咗我人生座右铭，我会记住自己要恰如其分，就算近年拍戏都好，做丑角，一定要令到个主角发光发亮，有啲嘢唔系你嘅，千祈唔好同争人，如果话我刻意去抢fo？其实努力去演好一个角色，我唔觉得系错，我控制唔到观众媒体钟唔钟意你？如果观众钟意你，佢哋就会留言，就会有讨论，咁唔系一件好事咩？」
访问最后，阿东叹了一口气，如释重负地说：「我终于可以讲我系自由身啦，过往我都多谢公司啦，因为公司令到『何远东』更多人认识，因为我以前只系一个舞台剧演员，这十六年其实多咗好多观众认识我，亦都会有好多唔同机会，但系未来就系自由身嘛，唔使再有任何束缚，我都希望可以参与唔同节目，我有好多嘢都未试过，例如如果喺第二度拍电视剧又会点呢？就算电影都好，之前拍过两出，打戏又试过文戏又试过，究竟仲有冇其他电影可以？我想继续挑战自己，希望大家仲想睇我。」
