60歲黎耀祥唔信一世行運 感嘆：我唔擺得幾耐 憑《巾幗》名利雙收15年丨獨家

2009年黎耀祥憑《巾幗梟雄》的「柴九」爆紅，15年後《巾幗梟雄之懸崖》的「柴十七」依然叫好叫座，首播7日獲跨平台收視24.8點，更成為黃金時段收視冠軍。儘管先聲奪人贏頭彩，4奪「視帝」在望，但60歲的黎耀祥竟然話冇諗過，更突然有感而發說：「上天將最好嘅嘢畀晒我，我唔知有冇福份可以繼續落去…我都幾十歲啦，正所謂『擺』得幾耐呀…」祥哥是否諗多咗？

採訪：方騫平 攝影：譚志光

祥哥唔強求，好知足，笑容都靚啲。

黎耀祥已將資產畀晒老婆。

祥哥放得好開。

黎耀祥恨創4屆視帝紀錄。

黎耀祥覺得置身演戲世界最安全。

再演《巾幗》系列對黎耀祥來說零負擔，反而曾向有壓力的對手胡定欣大派定心丸：「因為對手、背景、關係、人物、題材甚至場景都唔同，每個角色有唔同嘅特質，正如『柴十七』係有自信嘅富二代，肢體動作都比以前多。」祥哥指每位演員都有優點和缺點，各有支持者，唔認同觀眾要將胡定欣和鄧萃雯比較。

黎耀祥跟胡定欣20年來合作了8次。

黎耀祥、胡定欣成為最佳拍檔。

祥哥會為定欣做心理輔導。

《巾幗梟雄之懸崖》收視報捷。

左起：莊思明、馬海倫、黎耀祥、曾勵珍、關嘉敏、邵初、徐正康、編審張華標、監製方駿釗。

恨創4屆視帝紀錄

對於再衝擊「視帝」？祥哥就老實不客氣：「哈…我成日話，雖然明知唔會，但邊個唔鍾意發達呀？尤其可以刷新4屆視帝紀錄，不過，都係嗰句啦，得到觀眾認同比獎項更重要。」語畢，祥哥突然引爆心聲，半帶笑說：「我都幾十歲啦，仲『擺』得幾耐呀？可能我較為悲觀，唔會覺得自己好長命，可能只有10多年，因為上天將最好嘅嘢畀晒我，而且比我預計中攞多咗好多，我以為自己一世都係『跑龍套』，所以唔知仲有冇福份可以繼續。」他還補充，感覺上會比老婆早死，故資產都全交給佢：「就算我死咗佢都搞得掂。」

2009年祥哥首奪視帝。

黎耀祥首奪視帝，太太Julia與囝囝現身頒獎禮祝賀。

2019年祥哥及楊茜堯係視帝、視后。

黎耀祥係金牌男一。

祥哥有思考生死問題。

開心share扮死屍心得

黎耀祥自嘲只是一個不起眼的中學畢業生，對比80年代高大靚仔小生梁朝偉、劉德華、苗僑偉，笑言不用踎街經已好好：「入行單純係鍾意演戲，覺得喺演戲世界入面最有安全感，可以唔做自己，40年前又賺到3千月薪，就算扮死屍、扮村民一樣咁enjoy。」祥哥更開心share扮死屍心得：「係要用腹部嚟呼吸，連眼球都要定格，否則眼皮會穿崩，其實唔容易㗎。」重溫「柴九」金句「人生有幾多個十年？」他感恩過去15年上天安排賜予幾次大獎及穩定的財政和心態，少了經濟負擔相當重要：「𠵱家好幸福及滿足，上天安排每條路都好好，就算當年未上到一線位置都獲TVB 加薪4成，唯一小挫折係拍完《西遊記》後，1998年離開TVB嗰4年喺電影圈冇乜嘢撈；至於人生最遺憾係媽媽死得早，未能分享個仔嘅最大成就。」從演40年的祥哥未計劃退休：「既然上天畀你能力點解唔做呀？」他還寄語後輩要努力工作，不要計較，因為天道酬勤，做得好自然有回報。

黎耀祥憑《巾幗梟雄》的「柴九」爆紅。

「柴九」角色觀眾受落。

《巾幗梟雄》角色深入民心。

再同鄧萃雯合作的《巾幗梟雄之義海豪情》，成為2010年最高收視之冠。

2001跟張衛健、麥長青、江華演《西遊記》。

損手爛腳止蝕離場

另外，提到《巾幗梟雄之懸崖》中的「柴十七」是財經天才，現實中的祥哥剛好相反，他更爆出收收埋埋的小秘密，原來過去無論投資物業、買股票都是損手爛腳：「當年我$270買騰訊，眼見一度跌穿$200，嚇到我平手即放，點知升到$400幾；又趁1600美元好價，賣走台慶時贏返嚟嗰10安士黃金，𠵱家金價升近3000美元，計落唔見咗10幾萬；97年買樓又遇著冧市..我永遠係高追低賣，賺唔到好價錢，所以冇掂10年，現在冇任何投資只係做定期，穩收3厘幾息。」他抵死地引述老婆大人的說話：「佢話『反正多正財，如果畀埋横財你，仲有天理嘅？』」

#黎耀祥[超话]#